မောင်ရုပ်ဆိုး နှင့် အင်တာဗျူး (သို့) ဘလော့ဂ်များ၌ စွဲလမ်းခြင်း

မနေ့ညက ကျနော် အရှင်လတ်လတ် နတ်ပြည်ရောက်သွားတယ်ဗျ။ ကျနော့ဘေးနားမှာလည်း ကောင်မလေး ချောချောလေးတွေ အို…. များတာမှ ဘယ်လိုများသလဲဆိုတော့ အထည်ချုပ်စက်ရုံထဲ ရောက်သွားသလို၊ ဆေးလိပ်ခုံထဲ ရောက်သွားသလို၊ မိန်းကလေးကျောင်းထဲ ရောက်သွားသလို …. အဲဒီလိုကို …. မချောအများ ကိုယ်အခန့်သား ဆိုသလိုပေါ့ဗျာ ။

သူတို့ဆီက ရနံ့လေးတွေကလည်း မေမြို့ ရုက္ခဗေဒဥယျာဉ် (ယ္ခု ကန်တော်ကြီး အမျိုးသားဥယျာဉ်) ထဲရောက်သွားသလို၊ ပြင်သစ်ပြည်ကရေမွှေးနန်းတော်ထဲပဲ ရောက်သွားသလို၊ ညဈေးတန်းက ပန်းသေးခေါက်ဆွဲဆိုင်ပဲ ရောက်သွားသလို … မွှေးချက်ဗျာ … လွန်ရော….။

မီးရောင်တွေ တထိန်ထိန်၊ ဓါတ်ပုံတွေ တဖျပ်ဖျပ်နဲ့၊ ၀ိုင်းလာလိုက်တဲ့ သတင်းထောက်တွေကိုလည်း ကာရံပေးနေတဲ့ ကိုယ်ရံတော်တွေကအပြည့်၊ ဒီလိုအဖြစ်အပျက်ဆိုရင် မဟုတ်သေးပါဘူးဟ ဆိုပြီး ကိုယ့်ပေါင် ကိုယ်ပြန်ဆိတ်ကြည့်တော့မှ အားလားလားးးးးးးးးး အိပ်မက်ကိုးဗျ။ ဘယ်ရမလဲ ဒီလို အိပ်မက်မျိုးတော့ ဘယ်အလွတ်ခံနိုင်မလဲ။ ဇွတ်ကြိတ်မှိတ်ပြီးတော့ကို ဆက်မက်တာ။

လာပြီ … လာပြီ …။

မရွှေချောတစ်ယောက် …. မတ်ခွက်ကြီးကိုင်လို့ (အဲလေ) မိုက်ခွက်ကြီးကိုင်လို့။ “ကိုရုပ်ဆိုး” ကို ဗျူးချင်လို့ပါ ရှင်တဲ့….

ကျနော်ကလည်း ဘာရမလဲ …. ဗျူးပါဗျာ … ဗျူးပါ … အဗျူးခံချင်နေတာကြာလှပြီပေါ့ ….။

ဒါပေမယ့် စပြောကတည်းကိုက တလွဲ … ကိုရုပ်ဆိုးက ရုပ်အရမ်းဆိုးတယ်နော်တဲ့။ သွား, နင် ငါ့အနားမလာနဲ့ သွား … အော်ငေါက်ပစ်လိုက်တယ်။ ဘယ်ရမလဲ။ ဒီလို ဒဲ့ဒိုးကြီးပြောတာတော့ ဘယ်ခံလိမ့်မတုန်း။

ဟော … လာပြန်ပြီ နောက် မချော တစ်ယောက်။ မမြင်ချင်ယောင်ဆောင်ပြီး ဘေးနားက အချစ်ကလေးတွေနဲ့ ရီဖြဲဖြဲ လုပ်နေလိုက်တာပေါ့။

သူလေးက စကားစလာတယ် …. ကိုရုပ်ဆိုး ဆိုလို့၊ ရုပ်ဆိုးလိမ့်မယ်ထင်နေတာ။ ဒို့ အကိုက ခန့်ချောကြီးနော်တဲ့။ အင်း … ဒီကောင်မလေး လူမှုရေးမဆိုးဘူးဟ။ အလိုက်သိတယ်။ အဗျူးခံလိုက်မှ ….

အကို တဲ့

အကို … ဘယ်သူ့ ၀တ္ထုတွေ အဖတ်များလည်းတဲ့ …။ နိုကိုဥဇူးဇင်လား …၊ စောပြည့်အာပလာ လားတဲ့။

အို မဟုတ်တာ …. အကိုက ရွှေပြည်သူရဲ့ ၀တ္ထုတွေပဲဖတ်တာလို့။

ထပ်မေးသေးတယ် ….။ အကို … ဘယ်အကောင်လေးတွေကို အချစ်ဆုံးလည်းတဲ့ …။ ယုံလေးတွေလား၊ ပူးလေးတွေလား၊ ဟံဆာလေးတွေလားတဲ့။

အို မဟုတ်တာ … အကိုက “ဇင်ယော်”လေးပဲ ချစ်တာလို့။

ဒါဆို … အကို အခုလို အောင်မြင်နေတာကော ဘယ်သု့ ဒဿနတွေကို မှီငြမ်းလို့လည်းတဲ့ …။ ဒေးကာနက်ဂျီလား …၊ ဖေမြင့်လား တဲ့…

အို မဟုတ်တာ … အကိုက ရီပါတ်ဗလစ် ရဲ့ ဒဿနတွေကို မှီငြမ်းတာလို့။

သူလေးက စကားကြော ဒီလိုရှည်သေးတယ် …. အကို ရုပ်ရှင်ကြည့်တဲ့အခါ ဘယ်ဒါရိုက်တာ ကားတွေကို အကြည့်အများဆုံးလည်းတဲ့ … မီးပွားရဲ့ ရိုက်ချက်လား … ၊ စတီဗင် ဆာလာဖတ်လား တဲ့။

အို မဟုတ်တာ … မောင်မျိုး ရဲ့ ရင်တွင်းဖြစ်လေးတွေကိုပဲ ကြည့်တာလို့ …

အထွန့်တက်သေးတယ် ဒီလိုလေ … ဘယ် ရာသီဥတုကို အကြိုက်ဆုံးလည်းတဲ့ … နွေဦးလား၊ လေရူးလား၊ ဆောင်းဦးရွက်ကြွေ ချစ်သက်သေလားတဲ့ ….

အို မဟုတ်တာ … မေ လ မှာ ရွာတဲ့ မိုး လို့ ဒါမှမဟုတ်ရင် နှင်းစက်မိုး လို့…. ရဲရဲကြီးပေါ့ ဖြေလိုက်တယ်။

ကမ္ဘာလောကကြီးမှာ အကိုအကြိုက်ဆုံးကတဲ့ …. ပီဇာလား၊ နီနာလား၊ ပလီပလာ လားတဲ့ ….

အို မဟုတ်တာ … စိတ်ကူးကမ္ဘာလေး ပါ …

နောက်ပြီးတော့လေ … သူမက လေရှည်သေးတယ် … ရသ တွေထဲမှာ ဘယ်ရသကို အကြိုက်ဆုံးလည်းတဲ့ … ၀ီရ လား …၊ ဟာသ လား၊ ဘယ လား .... တဲ့

အို မဟုတ်တာ … ဓမ္မရသ ကို အနှစ်သက်ဆုံးပါကွယ် လို့ …

နောက်ဆုံးတစ်ခွန်းမေးမယ်နော်တဲ့ … ဟတ်ကဲ့လို့ ဖြေသံမဆုံးသေးဘူး ….

အကိုက ဘယ်လို လူနေမှုပုံစံကို အကြိုက်ဆုံးလည်းတဲ့ … မြို့သားစတိုင်လား၊ ဂြိုလ်သားစတိုင်လား …

အို မဟုတ်တာ … အကိုက ရွာသားလေး စတိုင်ကို အခိုက်ဆုံးပဲလို့၊ ကျွဲကျောင်း၊ နွားကျောင်း၊ မိန်းကလေးကျောင်းရင်း … ရင်း လေရှုရတာလို့၊ အကိုက ဗီလစ်ဂျား စတိုင်လို့ ...



တလက်စတည်းပါတဲ့ YTU ဆိုတဲ့ အဓိပ္ပါယ်ကို သိသလားတဲ့ .. You are Truly Understandable လားတဲ့


အို မဟုတ်တာ … သိတာပေါ့ You are Truly Ugly လို့ အဓိပ္ပါယ် ဖွင့်နေတုန်း …

“မောင်”ရေတဲ့ ထတော့တဲ့၊ ထမင်းအိုးလေး ထ တည်လိုက်ပါအုံး၊ သမီးအကြီးအတွက် ထမင်းချိုင့်၊ သားငယ်နိုးလာရင် စားဖို့အတွက်၊ ကျနော် မသွားခင် စားသွားဖို့အတွက်ဆိုပြီး ရှုမငြီးတဲ့ ချစ်ဇနီးလေး နှိုးလိုက်တာနဲ့ပဲ …. နေ့တနေ့ကို ရုန်းကန်ဖို့ အမှန်အကန် မောင်ရုပ်ဆိုး အိပ်ယာထက်မှ ကုန်းရုန်းနိုးထလိုက်လေတော့သတည်း ….. အဟီး ဟီး


*** ဘာရေးရမှန်းမသိလို့ စိတ်ကူးပေါက်ပေါက်နဲ့ ရေးထည့်လိုက်တဲ့ ဟာလေးပါ။ ဘလော့ဂ်ဂါ ညီအကို၊ မောင်နှမ များ ပြုံးပျော် ကြည်နှုးနိုင်ကြပါစေ .... လွန်တာရှိ ၀န္တာမိ၊ မပါသေးသူများ စိတ်မဆိုးကြေး ...

ကိုရုပ်ဆိုး

၂၂ ရက်၊ သြဂုတ်လ၊ ၀၈ (၁၇း၄၅)မိနစ်

ပုံနှိပ်စာလုံးရယူရန်